ANIBAR- Tregimi i Suksesit

Këtë muaj, për gjashtë net me radhë, Festivali Ndërkombëtar i Animacionit “ANIBAR” do të jetë ngjarje kryesore në qytetin e Pejës. Nga 22 deri 27 Gusht, 167 prodhues të filmave nga e gjithë bota do të ndajnë me ne tregimet e tyre përmes animacionit, të shfaqura në tre kinematë e festivalit. Për gjashtë net, qyteti i Pejës do të jetë i mbushur me filma, debate dhe muzikë që kanë filluar të bëhen traditë e qytetit. Qëllimi i festivalit ANIBAR është të promovojë animacionin në shoqërinë kosovare dhe të inkurajojë prodhuesit e filmave të të gjitha moshave të prodhojnë filma të animuar. Por për mua, Anibar është shumë më shumë se kaq.

ANIBAR është rinia kosovare. Është një grup i të rinjve që punojnë ditë e natë të sjellin në jetë një ide që nisi vite më parë. Një grup i të rinjve punëtorë, mendje kreative që filluan nga asgjëja dhe panë planet e tyre të bëhen realitet pavarësisht problemeve banale të vazhdueshme që duhet ti zgjidhnin. Një grup i të rinjve që nuk kanë një diplomë në animacion, marketing, menaxhim apo financa po në mënyrë briliante organizojnë një ngjarje që inkorporon filma, debate, punëtori dhe performancë të shkëlqyeshme muzikore për disa net në qytetin e vogël të Kosovës. ANIBAR është turizmi. Duhet një grup i vogël i të rinjve të organizojnë një festival në mënyrë që turistët të vizitojnë dhe të shohin se çka qyteti i bukur i Pejës ofron. Përmes shfaqjes së më shumë së 100 filmave, ANIBAR mirëpret vizitorë nga e gjithë bota të cilët vijnë dhe çuditen nga ajri dhe uji i freskët dhe mikpritja e Pejës, si dhe nga pamja mbresëlënëse e Maleve të Rugovës. Për të tretin vit me radhë, gjatë netëve të ANIBAR, qyteti i Pejës sjell net argëtimi për qytetarët e saj dhe bëhet pikë takimi për qytetarët e qyteteve tjera të Kosovës dhe qyteti i cili ne gusht është vend-ndalim i turisteve nga e gjithë bota. ANIBAR është kultura. Në dy edicionet e fundit, festivali ka shfaqur filma të animuar të cilat kanë trajtuar një laramani të temave; nga të qenurit deri tek vdekja; nga fuqia e muzikës tek kriza ekonomike greke; nga tregimi i një djaloshi të quajtur Danny tek vdekja e një ushtari në Irak. Gjatë ditëve të festivalit, animacioni si një teknikë e filmit do të prezantohet si një mënyrë e re të shprehjes së ideve, mendimeve dhe jetës së përditshme.

ANIBAR është tregimi i suksesit. Është ajo storje që ju tregon fëmijëve se si çdo gjë është e mundur nëse e do atë që e bën. Ne në ANIBAR e duam këtë festival dhe punojmë ditë e natë që të bëjmë këtë festival të funksionojë. Ne e duam edhe kur gjërat nuk shkojnë ashtu siç duhet, sepse në fund të ditës, kur shfaqja e filmave fillon, nuk ka kënaqësi më të madhe se buzëqeshja në fytyrat e të gjithëve. Ne në ANIBAR ju ftojmë të gjithëve të na bashkoheni që të bëjmë këtë festival më të madh. Ne ju ftojmë të bëheni pjesë e kësaj ngjarje që për ne është më shumë se një festival. Ne ju ftojmë të bëheni pjesë e tregimit të suksesit.